Оддий ёрдам мақоласи холос.

Ўқиб бўлгач унинг дархақиқат ижобий нафини сезсангиз, демак ширк келтирмабман.

Ахир хаётда барча нарса НОМИ билан эмас, нияти билан ўлчанур. Вахоланки натижасига хам ўзим жавобгар.

Кўпинча мошинада мозор олдидан ўтар эканман, негадир шу ерга кириб бироз айланиб, ўтириб кейин чиқиб кетишни истайман. Бу хол  менда кўпроқ хаёт ташвишлари қийнаб юборган пайтлари кўпроқ кузатилади.

Рости хам бунинг ўзгача бир давоси бор экан. Инсон танаси каби рухияти хам тез-тез зарарланиб туради.

Танда шамоллаш бўлгани каби, рухда хаволаниш хам бўлади.

Мана шундай пайтда вужудингизни дори билан, ким гиёхлар ёрдамида даволайди, ким эса ўтиб кетишини кутади.

Рухиятимизни хам даволовчи турфа йўлллари бўлгани билан,   кўпроқ шу вақт ўтишига ишонамиз. Лекин шу вақт ўтиши учун хам вақт керакку. Тана касалини вақтга ишониб ўтказсанг асорати ўша касалига қараб ёмонлашаверади. Рухиятда хам худди шундай.

Вахоланки ўша намоз, дуо деган нарсалар билан бир қаторда, муқобил турлари хам бор.

Севгидан куйганмисиз, мансабга интилиш, бойликдан айро қолдингизми, рости бир мозорга бориб 10-15 дақиқа айланиб кўринг. Майли зиёрат ўз йўлига, мен даъват қилаётган жойим йўқ, шунчаки бориб айланиб чиқинг, натижасини кўрасиз.

Ана ўша ердагина қадр-қиммат тушунчаларини фарқлаб, таққослаб хаётингиз қай йўлда, қайси қадриятларга интилиш билан вақтни ўтказаётганини тушуниб етасиз.

У ерга ўша куйган мухаббатингиз билан хам,  интилаётган мансабингиз билан хам, куйиб қолаётган молингиз билан хам келмаслигингизни фақат ўша ердагина хис қила оласиз.

Қараб турсангиз хеч бир гўр данғиллама участкадан иборат эмас, хеч бир лахаддан кўчага қўйиб кирган ласеттийингиз кўриниб тургани хам йўқ.

Билмадим тушунтира оляпманми йўқми, ниятим бу дуне  тартиблари, ундаги манфаат ва бошқа нарсалардан совитиш эмас. Лекин унга мухаббат қўйиш  хам эмас аслида!

Инсонни маънавий ғарибликдан асрасин экан. Минг бой бўлинг, хамма нарсангиз бўлсину лекин оғзингизни очсангиз маънавий "хиди”дан пашшалар ёпириладиган бўлса нима кераги бор яшашни? Шунчаки кимнингдир фойдали ўрнини эгаллаб, атмосферани ортиқча булғаб туриш холос.

Қанчадан қанча буюк инсонлар фақир бўлгани билан хануз хурматда. Чунки уларга бойликни кераги бўлмаган. Асрлар оша ўз бойлигини гўрига орқалаб эмас, тарихга мухрлаб кетган. Бу дунёдаги интилиб орттираётганингизни тарихга мухрлаб кўрингчи. Қай бир тарихга Мальдив оролларига бориб ўйнаб келганингизу, кўчадаги фалончи хайдаган мерседеси  кираркин?

Хаётда терапия сўзи бир қанча нарсаларга уланиб бормоқда. Аввал тиббиётда кенг қўлланиладиган нарса бора-бора ароматерапия, фитотерапия яна нимадиртерапия...

 Хар куни кимдир қаергадир шошади, хаммамизнинг хаёлимизда турфа хил муаммолар ва барининг тубида ўша қорин муаммоси, кийим илинжи, бойлик орзуси, мухаббат нафси ва хоказолар бўлиши аниқ.

Нима хам қилардик ахир бу дунёга келишимизни ўзимиз хал қилмаганмиз, яшаш керак дерсиз.

Тўғри.

Лекин мана шу нарсаларнинг чегараси, онгли мувозанат йўқотиш ва  рухиятдаги хаволаниш касаллигига чалинганда оддий мозоратерапияни тавсия қиламан.

Психологни хам кераги йўқ. Шунчаки бориб бироз вақтингизни ўтказинг.

У инкор этиб бўлмас бўлган хақ жой!

Ахир кунига қанчадан-қанча ёлғон йўлларни босиб ўтиб, қанчадан-қанча ёлғон манзилларга интиламиз...